³ÉÈËVRÊÓƵ

"Mae fy nhaith ym myd addysg wastad wedi ei ysgogi gan fy mrwdfrydedd dros ddysgu, ieithoedd a chreu cyfleoedd i eraill. Yn wreiddiol o Baku, Azerbaijan, dechreuais ddatblygu fy llwybr mewn addysg yn ifanc, a thros amser rydw i wedi tyfu i fod yn addysgwr, yn entrepreneur, ac yn llysgennad grymuso merched sy'n canolbwyntio ar ehangu mynediad at addysg ryngwladol.

Chwaraeodd fy amser ym Mhrifysgol Bangor ran bwysig wrth lunio'r daith honno. Rhoddodd fy ngradd Meistr mewn Addysg ym Mhrifysgol Bangor sylfaen academaidd gref a dealltwriaeth ymarferol o systemau addysgol i mi, a ddaeth yn hanfodol yn ddiweddarach wrth ddatblygu fy mentrau addysgol fy hun. Fe wnaeth y wybodaeth a'r sgiliau a gefais fy helpu i sefydlu fy musnesau sy'n canolbwyntio ar addysg, a llywio’n llwyddiannus y gofynion trwyddedu ar gyfer fy nghanolfan addysg plentyndod cynnar a'm gwaith ymgynghorol i golegau yn yr Unol Daleithiau. Roeddwn i hefyd yn gwerthfawrogi’n fawr y gymuned amrywiol o fyfyrwyr a’r amgylchedd dysgu cefnogol, a’m helpodd i ddatblygu hyder a safbwynt byd-eang sy’n parhau i ddylanwadu ar fy ngwaith heddiw.

Symudais i'r Unol Daleithiau ar ôl cael EB-1A (Fisa Einstein) ar gyfer unigolion â gallu eithriadol, gyda’r gydnabyddiaeth a gefais yn seiliedig ar fy ngwaith a'm llwyddiannau mewn entrepreneuriaeth. Roedd y garreg filltir hon yn caniatáu i mi ehangu fy ngwaith ym myd addysg ar lefel ryngwladol.

Yn yr Unol Daleithiau, sefydlais nifer o fusnesau sy'n canolbwyntio ar addysg. Fi yw sylfaenydd A-Level Global, cwmni lleoliadau prifysgol ac ymgynghori colegau sy'n cefnogi myfyrwyr gyda derbyniadau i brifysgolion, yn ogystal â lleoliadau ysgolion preswyl ac ysgolion therapiwtig. Drwy’r gwaith hwn, rydw i hefyd yn recriwtio myfyrwyr talentog o Azerbaijan a rhanbarthau eraill i astudio yn yr Unol Daleithiau ac yn eu cynghori ynghylch hynny. Fel rhan o fy ngwaith fel ymgynghorydd colegau, rydw i wedi llwyddo i leoli llawer o fyfyrwyr ym Mhrifysgol Bangor, ac mae'n hynod werth chweil eu gweld yn tyfu i fod yn weithwyr proffesiynol llwyddiannus yn eu priod feysydd.

Fi hefyd yw sylfaenydd a chyfarwyddwr A-Level Minds, canolfan addysg plentyndod cynnar wedi ei lleoli ym Maryland. Mae'r rhaglen hon yn arbennig o agos at fy nghalon. Mae'n ganolfan amlddiwylliannol ac amlieithog lle rydym yn canolbwyntio ar ddatblygu plant yn academaidd, yn gymdeithasol ac yn emosiynol wrth feithrin cariad at ddysgu o oedran cynnar. Ar hyn o bryd rydym yn y broses o ehangu ac agor lleoliad cyn-feithrin arall yng nghanol dinas Baltimore.

Yn ogystal, lansiais A-Level Medical Externship, sy'n rhoi cyfleoedd i fyfyrwyr ennill profiad ymarferol a dod i gysylltiad â'r maes meddygol, gan eu helpu i baratoi ar gyfer gyrfaoedd yn y dyfodol.

Ochr yn ochr â datblygu fy musnesau, rydw i wedi parhau i fod yn ymrwymedig i'm haddysg fy hun. Yn ddiweddar, llwyddais i gwblhau fy MBA ym Mhrifysgol Gwyddoniaeth a Thechnoleg Washington. Roedd hwn yn llwyddiant arbennig o arwyddocaol i mi, gan i mi gwblhau fy MBA tra roeddwn yn feichiog, a chroesawais fy merch fach ym mis Hydref 2025. Mae cydbwyso mamolaeth, addysg ac entrepreneuriaeth wedi bod yn heriol ac yn hynod werth chweil.

Wrth edrych yn ôl, chwaraeodd fy mhrofiad ym Mhrifysgol Bangor ran allweddol wrth lunio fy llwybr proffesiynol a rhoi'r offer i mi i adeiladu ac ehangu fy ngwaith yn rhyngwladol. Heddiw, fy nghenhadaeth yw parhau i greu cyfleoedd addysgol sy’n cael effaith a chefnogi myfyrwyr ar bob cam o'u taith—o blentyndod cynnar i'r brifysgol a thu hwnt.

Fy nghyngor i fyfyrwyr fyddai dyfalbarhau, croesawu heriau, a pheidio byth â rhoi'r gorau i ddysgu. Efallai na fydd eich taith bob amser yn hawdd, ond gydag angerdd a phenderfyniad, gallwch adeiladu rhywbeth gwirioneddol arwyddocaol."