Yn dilyn y gydnabyddiaeth gan Wobr Pen-blwydd y Frenhines, gwahoddwyd Prifysgol Bangor i gymryd rhan yn Her y Coroni CreaTech. Lansiwyd y fenter ymchwil blwyddyn gyfan hon, a gomisiynwyd gan yr Adran dros Dechnoleg Ddigidol, Diwylliant, y Cyfryngau a Chwaraeon (DCMS), fel rhan o fenter Gweledigaeth Sector 2023— sydd â’r nod o ysgogi twf o fewn Diwydiannau Creadigol y Deyrnas Unedig.
Cynullwyd tîm project Her y Coroni gan yr Ymddiriedolaeth Pen-blwydd Brenhinol, a daeth â chynrychiolwyr ynghyd o 22 o brifysgolion a cholegau a oedd wedi ennill Gwobr Pen-blwydd y Frenhines yn ddiweddar.
Yn ystod y flwyddyn, daeth arloeswyr, crewyr a busnesau o’r Deyrnas Unedig sy’n gweithio ym maes technolegau creadigol ynghyd ag academyddion ac ymchwilwyr yn y diwydiannau creadigol i lunio adroddiad cynhwysfawr i Lywodraeth y Deyrnas Unedig:
Cynrychiolwyr Prifysgol Bangor yn y fenter hon oedd yr Athro Andrew Lewis, cyfansoddwr arobryn ac unigolyn a gydnabyddir yn rhyngwladol ym maes cyfansoddi acwsmatig, a’r Athro Andrew McStay, Athro Technoleg a Chymdeithas a Chyfarwyddwr y Labordy Deallusrwydd Artiffisial Emosiynol.
Mae gan yr Athro Lewis ddiddordeb ym materoldeb sain ganfyddedig a’r defnydd o dechnoleg i wireddu syniadau cerddorol newydd, tra bod yr Athro McStay yn arbenigo mewn goblygiadau moesegol a chymdeithasol deallusrwydd artiffisial.
Gwnaeth y fenter hon amlygu’r potensial o gysylltu creadigrwydd a thechnoleg yn rhwydd. Mae’r Diwydiannau Creadigol, sy’n werth tua £125 biliwn i economi’r Deyrnas Unedig, yn sbardun allweddol i dwf, a dylai cerddoriaeth fod ar flaen y gad o ran datblygiad technolegol. O ddylunio sain archfarchnadoedd i draciau sain gemau fideo trochi, mae cyfuno’r meysydd hyn yn siapio profiadau bob dydd ac yn ysgogi arloesedd.
Mae'r diwydiannau creadigol yn chwarae rhan hanfodol yn economi'r Deyrnas Unedig, ac mae gan ddeallusrwydd artiffisial le i hybu ymdrechion y diwydiannau hyn. Fodd bynnag, mae'n hanfodol ystyried sut mae'r technolegau hyn yn ymgysylltu â bywyd dynol. Atgyfnerthodd yr her hon pa mor bwysig yw deall y rhyngweithio rhwng pobl a deallusrwydd artiffisial, a'r angen am ddeallusrwydd artiffisial cyfrifol. Gall y diwydiannau creadigol helpu gyda’r genhadaeth hon, gan ddefnyddio creadigrwydd dynol i wireddu gwasanaethau sy’n diddanu, yn cyfoethogi ac yn ysbrydoli, yn hytrach na thrin neu ecsbloetio.
Mae Prifysgol Bangor yn falch o fod wedi bod yn rhan o’r fenter drawsnewidiol hon, gan gyfrannu ei harbenigedd at broject sy’n amlygu potensial aruthrol y Diwydiannau Creadigol a thechnoleg newydd. Mae’r adroddiad terfynol yn gwneud argymhellion allweddol i Lywodraeth y Deyrnas Unedig, gan gynnwys yr angen am fwy o fuddsoddiad mewn ymchwil a datblygiad, gwell llwybrau addysgol i fynd i'r afael â bylchau sgiliau, a phartneriaethau cryfach rhwng diwydiant a'r byd academaidd.
Mae'r Brifysgol yn parhau i fod yn ymrwymedig i gefnogi arloesedd yn y maes hwn, gan sicrhau bod creadigrwydd a thechnoleg yn parhau i ffynnu mewn cytgord er budd cenedlaethau'r dyfodol.