³ÉÈËVRÊÓƵ

Archwiliwch sut mae technolegau gwyliadwriaeth yn ail-lunio cyfiawnder troseddol. Mae Prifysgol Bangor yn asesu a oes digon o ddiddordeb mewn cynnig y modiwl Lefel 7 hwn sy'n werth 20 credyd fel micro-gymhwyster annibynnol.

Archwiliwch wyliadwriaeth ym maes plismona, rheoli ffiniau a rheoli troseddwyr, gan gynnwys plismona cudd a defnyddio swyddogion cudd, deallusrwydd artiffisial, biometreg a goblygiadau technoleg o ran cyfiawnder, grym, cynhwysiant ac allgáu.

Statws presennol

Mae Prifysgol Bangor wrthi’n asesu’r galw am Gwyliadwriaeth, Technoleg a Chyfiawnder Troseddol. Nid yw’r micro-gymhwyster ar agor i geisiadau nac i ymrestru ar hyn o bryd. Nid ydych yn cyflwyno cais am le drwy gwblhau’r ffurflen mynegi diddordeb. Nid yw mynegi diddordeb yn gwarantu y caiff y cwrs ei gynnig nac y cewch le arno.

Ynglŷn â'r micro-gymhwyster hwn

Mae Gwyliadwriaeth, Technoleg a Chyfiawnder Troseddol yn fodiwl Lefel 7 sy’n werth 20 credyd. Os caiff ei gynnig fel micro-gymhwyster annibynnol, caiff ei gyflwyno’n rhan-amser yn ystod Semester 2 drwy weithdai wythnosol. Mae’r modiwl yn archwilio technolegau gwyliadwriaeth a diogelwch ym maes plismona ac ar draws y system cyfiawnder troseddol ehangach.

Ar gyfer pwy mae'r micro-gymhwyster hwn?

Mae'r micro-gymhwyster hwn wedi'i anelu at weithwyr proffesiynol sy'n gweithio ym maes cyfiawnder troseddol neu feysydd cysylltiedig ac sydd am ddeall sut mae datblygiadau technolegol yn llywio arferion gwyliadwriaeth. Gall hefyd fod yn berthnasol i ddysgwyr sydd â chefndir academaidd mewn troseddeg, plismona, y gyfraith, cyfiawnder troseddol neu bwnc cysylltiedig.

Pam astudio'r micro-gymhwyster hwn?

Byddwch yn archwilio ymagweddau hanesyddol a chyfoes at wyliadwriaeth ac yn ystyried sut y defnyddir technolegau i reoli troseddau, rheoli ffiniau a rheoli troseddwyr. Drwy ddeunydd damcaniaethol ac empirig ac astudiaethau achos, byddwch yn ystyried yn feirniadol faterion sy'n ymwneud â grym, gwleidyddiaeth, gwrthsafiad, rheolaeth, cyfiawnder a rheolaeth y gyfraith.

Gall yr astudiaethau achos dangosol gynnwys cronfeydd data DNA, datgeliadau Snowden, y Rhyngrwyd Pethau a gwyliadwriaeth filwrol.

Sut caiff y micro-gymhwyster hwn ei gyflwyno?

Disgwylir i'r micro-gymhwyster gael ei gyflwyno yn ystod Semester 2 dros gyfnod o 12 wythnos addysgu. Bydd yr addysgu fel arfer ar ffurf gweithdy dwy awr bob wythnos sy'n cyfuno darlithoedd a dysgu mewn grwpiau. Bydd disgwyl ichi baratoi drwy wneud y darllen penodedig ac astudio'n annibynnol.

Y dyddiad dechrau arfaethedig yw Ionawr 2027.

Tiwtoriaid

Yr Athro Martina Feilzer

Mae'r Athro Martina Feilzer yn Athro mewn Troseddeg a Chyfiawnder Troseddol. Mae ei diddordebau ymchwil yn cynnwys plismona, gwasanaethau prawf, polisi cosbi, cyfreithlondeb ac ymddiriedaeth y cyhoedd mewn cyfiawnder troseddol.

Proffil staff: Yr Athro Martina Feilzer

Dr Bethan Loftus

Mae Dr Bethan Loftus yn Ddarllenydd mewn Troseddeg a Chyfiawnder Troseddol. Mae ei hymchwil yn cynnwys gwyliadwriaeth, plismona cudd a defnyddio swyddogion cudd, gorfodi rheolaethau ffiniau a'r defnydd o ddeallusrwydd artiffisial wrth orfodi'r gyfraith.

Proffil staff: Dr Bethan Loftus

Beth fyddwch chi’n ei astudio ar y cwrs yma?

Byddwch yn astudio datblygiadau a dadleuon allweddol ynghylch defnyddio technolegau gwyliadwriaeth a diogelwch ar draws y system cyfiawnder troseddol. Byddwch yn archwilio sut y caiff y technolegau hyn eu defnyddio wrth reoli troseddau, rheoli ffiniau a rheoli troseddwyr, ac yn dadansoddi gwyliadwriaeth gyfoes yn feirniadol o safbwyntiau hanesyddol, damcaniaethol ac empirig.

Mae'r pynciau dangosol yn cynnwys:

• dulliau hanesyddol a chyfoes o wyliadwriaeth ym maes plismona;
• gwyliadwriaeth dorfol a mathau o wyliadwriaeth sy'n targedu unigolion;
• plismona cudd a defnyddio swyddogion cudd;
• y defnydd o ddeallusrwydd artiffisial ar draws y system cyfiawnder troseddol, o blismona i'r gwasanaethau prawf;
• biometreg a rheoli troseddau;
• gwyliadwriaeth fyd-eang a ffiniau; ac
• effaith gwyliadwriaeth a thechnoleg ar gynhwysiant ac allgáu.

Os caiff y micro-gymhwyster ei gynnig, y ffi ar gyfer blwyddyn academaidd 2026/27 fydd £1,168.

Gweler ein tudalen Ffioedd a Chyllid Ôl-raddedig am ragor o wybodaeth.

FFIOEDD A CHYLLID ÔL-RADDEDIG

Os caiff y micro-gymhwyster ei gynnig, byddwn yn croesawu ceisiadau gan raddedigion a gweithwyr proffesiynol profiadol.

Fel arfer, dylai fod gan ymgeiswyr un o'r canlynol:

• gradd anrhydedd israddedig 2:2 neu uwch, neu gymhwyster cyfatebol, mewn troseddeg, plismona, y gyfraith, cyfiawnder troseddol neu bwnc cysylltiedig; neu
• brofiad proffesiynol perthnasol, cymwysterau proffesiynol amgen, neu gyfuniad o'r ddau, mewn maes sy'n ymwneud â throseddu, cyfiawnder, plismona, y gyfraith, polisi, diogelu'r cyhoedd neu faes cysylltiedig.

Caiff ceisiadau sy'n seiliedig ar brofiad proffesiynol eu hystyried yn unigol, gan ystyried eich profiad ac unrhyw astudiaeth ddiweddar neu ddatblygiad proffesiynol sy'n dangos eich bod yn barod i astudio ar Lefel 7.

Cyflwynir y cwrs yn Saesneg. Rhaid i ymgeiswyr nad ydynt yn siarad Saesneg neu Gymraeg fel iaith gyntaf gyflwyno tystiolaeth o hyfedredd yn y Saesneg sy'n cyfateb i IELTS 6.0, heb unrhyw elfen unigol yn is na 5.5.

Cofrestrwch eich diddordeb

Mae Prifysgol Bangor wrthi’n asesu’r galw am Gwyliadwriaeth, Technoleg a Chyfiawnder Troseddol fel micro-gymhwyster annibynnol Lefel 7 sy’n werth 20 credyd. Nid yw’r cwrs wedi’i gadarnhau, ac nid yw ar agor i geisiadau nac i ymrestru ar hyn o bryd.

Cwblhewch y ffurflen fer os hoffech gofrestru eich diddordeb. Byddwn yn defnyddio'r wybodaeth a ddarperir gennych i asesu'r galw ac i gysylltu â chi os bydd rhagor o wybodaeth ar gael am argaeledd, ffioedd a threfniadau gwneud cais neu ymrestru.

Nid ydych yn cyflwyno cais am le drwy gwblhau’r ffurflen mynegi diddordeb. Nid yw mynegi diddordeb yn gwarantu y caiff y cwrs ei gynnig nac y cewch le arno.