����VR��Ƶ

Mae Prifysgol Bangor wedi ennill gwobr arian sefydliadol Athena Swan. Prifysgol Bangor yw'r ail brifysgol yng Nghymru i ennill gwobr arian; mae llai na 40 o brifysgolion ledled y Deyrnas Unedig wedi ennill gwobr arian.

Fframwaith yw siarter Athena SWAN a ddefnyddir ledled y byd i gefnogi a thrawsnewid cydraddoldeb rhyw mewn ymchwil ac addysg uwch. Gall sefydliadau wneud cais am wobr efydd, arian neu aur. Mae Prifysgol Bangor yn ddeiliad gwobr efydd ers 2011 (adnewyddwyd y dyfarniad yn llwyddiannus yn 2014 a 2018). Er mwyn ennill gwobr arian, mae'n rhaid i sefydliadau ddangos cynnydd a llwyddiant arwyddocaol wrth fynd i'r afael ag anghydraddoldeb rhwng y rhywiau.

Fel rhan o'r cyflwyniad, datblygodd Prifysgol Bangor gynllun gweithredu pum mlynedd sy'n cynnwys wyth maes blaenoriaeth sy'n adlewyrchu ymrwymiad ac uchelgais parhaus y brifysgol i ddatblygu cydraddoldeb rhywiol. 

“Camp fawr i Brifysgol Bangor”

�ѱ��岹��’r Is-ganghellor, yr Athro Edmund Burke, “Mae ennill gwobr arian Athena Swan yn gamp fawr i Brifysgol Bangor. Mae ein hymrwymiad i gydraddoldeb, amrywiaeth a chynhwysiant yn allweddol i’n cynaliadwyedd a’n llwyddiant hirdymor ac rwy’n falch dros ben bod ein hymrwymiad a’n gwaith caled wedi cael eu cydnabod. Hoffwn longyfarch a diolch i bawb a gyfrannodd at y cais llwyddiannus.”

�ѱ��岹��’r Athro Morag Mcdonald (Dirprwy Is-ganghellor Gwyddoniaeth a Pheirianneg a Dirprwy Is-ganghellor Cynorthwyol dros Amrywiaeth a Chynhwysiant) a arweiniodd ar y cais:
“Rwy’n hynod o falch ein bod wedi ennill gwobr arian sefydliadol Athena Swan i gydnabod ein hymdrechion i sicrhau cydraddoldeb rhywiol ym Mangor. Rydym wedi gwneud cynnydd sylweddol mewn sawl maes dros y ddegawd ddiwethaf ac mae’n wych cael cydnabyddiaeth am bopeth sydd wedi ei gyflawni ledled y brifysgol.” 

Sefydlwyd Siarter Athena Swan yn 2005 i annog a chydnabod ymrwymiad i hyrwyddo gyrfaoedd merched sy’n gweithio mewn gwyddoniaeth, technoleg, peirianneg, mathemateg a meddygaeth (STEMM) mewn addysg uwch.  Ehangwyd y siarter yn 2015 i gynnwys yr holl adrannau academaidd a’r gwasanaethau proffesiynol. Cafodd ei ehangu eto yn 2021, ac mae’r siarter Athena Swan newydd bellach yn cefnogi mwy o gynwysoldeb i bobl ym mhob swydd, o bob hunaniaeth rhywedd, a’r rhai sy’n wynebu anghydraddoldebau croestoriadol. Mae hefyd yn grymuso cyfranogwyr i wneud ymrwymiadau gweithredol yn unol â'u nodau cydraddoldeb rhywiol, yn ogystal â chydnabod a gwobrwyo gwaith ym maes cydraddoldeb rhywiol.