����VR��Ƶ

Dan arweiniad Rhwydwaith Niwroamrywiaeth Staff Prifysgol Bangor (BU ND), mae rhaglen yr wythnos yn gwahodd cymuned gyfan y Brifysgol i ddysgu mwy am niwroamrywiaeth, cysylltu ag eraill, ac archwilio ffyrdd o greu amgylchedd dysgu a gweithio mwy cynhwysol.

Wrth galon y dathliadau bydd gosodiad celf drawiadol yn atriwm prif adeilad Pontio. Bydd y gosodiad yn cynnwys dros 500 o lusernau papur lliwgar wedi’u hongian o’r nenfwd, gan symboleiddio creadigrwydd, amrywiaeth a pha mor unigryw yw meddyliau niwroamrywiol ar draws y Brifysgol. Nod yr arddangosfa weledol yw dathlu’r nifer o ffyrdd mae pobl yn meddwl, yn dysgu ac yn profi’r byd. Caiff ymwelwyr eu hannog i weld y gosodiad drwy gydol yr wythnos a rhannu eu lluniau ar-lein gan ddefnyddio’r hashnod #NCWBangor.

Mae’r dathliadau hefyd yn nodi lansiad Meddyliau Lliwgar, menter ymwybyddiaeth niwroamrywiaeth newydd ym Mhrifysgol Bangor. Nod y fenter yw codi ymwybyddiaeth o brofiad niwroamrywiol o fewn cymuned y Brifysgol, wrth agor sgyrsiau am sut y gall amgylchedd cynhwysol fod o fudd i bawb, beth bynnag yw eu niwro-deip.

Drwy gydol yr wythnos, bydd ystod o weithgareddau, trafodaethau ac adnoddau ar gael i staff a myfyrwyr. Bydd y digwyddiadau hyn yn canolbwyntio ar rannu gwybodaeth, tynnu sylw at brofiadau byw, a darparu syniadau ymarferol y gellir eu rhoi ar waith ar unwaith i gefnogi unigolion niwroamrywiol mewn lleoliadau astudio a gwaith.

Dywedodd Matt Coles, Arweinydd Rhwydwaith Niwroamrywiaeth y Staff: “Rwy’n hynod falch o’r calendr o ddigwyddiadau rydym wedi gallu eu trefnu i nodi Wythnos Dathlu Niwroamrywiaeth ym Mhrifysgol Bangor. Mae wedi cymryd misoedd o gynllunio, cydweithio ym mhob cornel o’r campws, a llawer iawn o waith, ond rydym wedi llunio digwyddiadau, ac rydw i’n gobeithio y bydd yn brofiad gwirioneddol ysbrydoledig i’n staff a’n myfyrwyr, ac yn gyfle iddynt gael mewnwelediad i fywyd person â niwroamrywiaeth. Mae ein gosodiad lusernau papur yn Pontio yn gynrychiolaeth hardd o’r holl feddyliau sydd yma, ac rwy’n gobeithio y bydd pawb sy’n ymweld yn ei fwynhau.”

Dywedodd Beth Edwards, Uwch Swyddog a chyn-fyfyriwr:“Fel cyn-fyfyriwr, mae’n golygu llawer i mi rŵan fod yn rhan o drefnu gweithgareddau ar gyfer Wythnos Dathlu Niwroamrywiaeth yn y Brifysgol. Yn ystod fy nghyfnod yn astudio yma, gwnaeth y gefnogaeth a gefais wahaniaeth gwirioneddol i’m profiad a’m helpu i lwyddo mewn ffyrdd nad oeddwn bob amser yn meddwl oedd yn bosibl.

Mae Wythnos Dathlu Niwroamrywiaeth yn ymwneud â chydnabod a gwerthfawrogi’r gwahanol ffyrdd y mae pobl yn meddwl, yn dysgu ac yn profi’r byd. Mae’n gyfle i dynnu sylw at gryfderau pobl niwroamrywiol, tra hefyd yn parhau â sgyrsiau pwysig am hygyrchedd, dealltwriaeth a chefnogaeth.

Rwy’n falch o gyfrannu at ddigwyddiad sy’n dathlu gwahaniaeth ac yn helpu i greu cymuned prifysgol fwy cynhwysol i fyfyrwyr presennol a’r rhai yn y dyfodol.”