����VR��Ƶ

Cynhelir y digwyddiad yn Neuadd Powis, Prifysgol Bangor rhwng 13:30 a 18:00 ddydd Llun 2 Tachwedd 2026.

Caiff y digwyddiad ei gynnal gan y Religion Media Centre, sy’n sefydliad annibynnol, a hynny mewn cydweithrediad â’r maes pwnc Athroniaeth, Moeseg a Chrefydd ym Mhrifysgol Bangor, a Chanolfan Genedlaethol Addysg Grefyddol Cymru.

Ar adeg pan y gall straeon am grefydd a chred gyffwrdd â chredoau dwfn a thensiynau cymdeithasol dwys, bydd y digwyddiad ‘Creating Connections: Religion and the Media in Wales’ yn dod â newyddiadurwyr, cynrychiolwyr ffydd, pobl ifanc ac academyddion at ei gilydd yn yr un ystafell. Y nod yw meithrin dealltwriaeth o sut mae'r straeon hyn yn cael eu hadrodd, gan roi lle i gwestiynau anodd ynghyd â thynnu sylw at y gwaith beunyddiol, y cysylltiadau cymunedol a’r straeon cadarnhaol sy’n cael llai o sylw.

Ymhlith y cyfranwyr mae’r Gwir Barchedig Ddoethur Manon Ceridwen James, a benodwyd yn ddiweddar yn Esgob benywaidd cyntaf Bangor; a'r Parch. Glyn Wise, sy'n adnabyddus i lawer o’r rhaglen Big Brother ac sydd bellach yn weinidog gyda’r Eglwys yng Nghymru. Bydd Alison Gow, cyn-olygydd y Daily Post ac aelod o fwrdd Sefydliad Annibynnol Safonau’r Wasg, yn ymuno â phanel a fydd yn archwilio sut mae’r cyfryngau’n adlewyrchu crefydd yng Nghymru.

Bydd academyddion o Brifysgol Bangor, sef yr Athro Nathan Abrams, Dr Joshua Andrews a Dr Gareth Evans-Jones, yn archwilio tirwedd grefyddol gyfoes Cymru ac yn archwilio'r rôl hanfodol y mae addysg yn ei chwarae wrth lunio dealltwriaeth ynghylch ffydd, cred a hunaniaeth. Bydd yr Athro Ruth McElroy yn cyfrannu at drafodaeth banel ynglŷn â safbwyntiau golygyddol a chyhoeddi, tra bydd amrywiaeth o sesiynau’n ystyried sut mae straeon am ffydd a chrefydd yn cael eu cynrychioli, eu cyfathrebu a’u cynnwys ar draws llwyfannau amrywiol y cyfryngau. Bydd myfyrwyr presennol Prifysgol Bangor ym maes Athroniaeth, Moeseg a Chrefydd ac ym maes y Cyfryngau hefyd yn cymryd rhan yn y digwyddiad, gan ymgysylltu â’r siaradwyr, cyfrannu at drafodaethau a rhannu eu safbwyntiau eu hunain ar y groesffordd rhwng ffydd, diwylliant, addysg a'r cyfryngau yn y gymdeithas gyfoes.

Meddai’r Athro Edmund Burke, Is-ganghellor Prifysgol Bangor:

“Dylai prifysgolion fod yn fannau lle gall pobl ofyn cwestiynau anodd a gwrando’n ofalus ar ei gilydd. Mae'r digwyddiad hwn yn dod â’r rhai y mae eu straeon yn cael eu hadrodd a'r rhai sy'n adrodd y straeon hynny at ei gilydd. Rwy'n gobeithio y bydd y sgyrsiau a geir yn helpu i ddyfnhau dealltwriaeth ynghylch crefydd a chred yng Nghymru ac yn arwain at roi mwy o sylw i straeon ein cymunedau ni.”

Dywed Cadeirydd Gweithredol y Religion Media Centre, Michael Wakelin: “Mae’r Religion Media Centre yn falch o gael gweithio ochr yn ochr ag academyddion ym Mhrifysgol Bangor i gynllunio a chyflwyno’r digwyddiad hwn. Rydym bob amser yn awyddus i weithio gyda grwpiau a sefydliadau lleol i ddod â phobl ynghyd gan sicrhau bod ein digwyddiadau'n adlewyrchu'r cymunedau y maent yn eu gwasanaethu. Rydym wedi gwerthfawrogi'n arbennig y brwdfrydedd a'r gefnogaeth a gawsom gan gydweithwyr ym Mangor.”

Diben y Religion Media Centre yw helpu i godi lefelau llythrennedd a dealltwriaeth grefyddol rhwng cymunedau ffydd a'r cyfryngau. Rydym yn aml yn clywed gan grwpiau ffydd eu bod yn teimlo eu bod wedi cael eu camddeall, eu camliwio neu eu hanwybyddu. Gall meithrin perthnasoedd lleol cryfach helpu i fynd i’r afael â’r bwlch hwnnw, gan gryfhau dealltwriaeth a gwella cydlyniant cymdeithasol.”

Cynhelir y digwyddiad ‘Creating Connections’ rhwng 13:30 a 18:00 ddydd Llun 2 Tachwedd 2026, yn Neuadd Powis, Prif Adeilad y Celfyddydau, Prifysgol Bangor, LL57 2DG. . Cysylltwch ag info@religionmediacentre.org.uk neu 0203 970 0709, neu ncrew@bangor.ac.uk os oes gennych unrhyw ymholiadau.